Bakıda “Formula 1 Azərbaycan Qran Prisi” zamanı yarışların təşkilatçısı Bakı Şəhər Halqası Əməliyyat Şirkəti korporativ sosial məsuliyyət siyasəti çərçivəsində bir sıra ekoloji layihələr həyata keçirib. Bu haqda bu gün, 7 iyul tarixində 1News məlumat verib.
ADA Universiteti, Bakıda keçirilən yarış zamanı media mərkəzi kimi fəaliyyət göstərən “Hilton” hoteli, “Bakı Tullantılarının Emalı” MMC, “EcoSolutions” tullantıların idarəolunması xidməti ilə əməkdaşlıq nəticəsində 14,899 kiloqram plastik tullantı yığılaraq utilizə edilib. Öz növbəsində, yarış zamanı toplanan 290 kiloqram yemək qalıqları sahibsiz heyvanlar üçün sığınacağa təhvil verilib.
Formula 1-in 2030-cu ilə qədər sıfır karbon emissiyası hədəfinə fokuslanan bu layihələr ətraf mühiti qorumaq və dəstəkləmək, həmçinin motor idmanında təkrar emal və davamlı innovasiyaları təşviq etmək məqsədi daşıyır.
