Keçmiş Bakı təkər zavodunun hazırda qəzalı vəziyyətdə olan binasında 142 ailə yaşayır. Bu haqda 17 iyul tarixində BakuTV reportaj təqdim edib.
Burada yaşayan insanlar zavodun keçmiş işçiləridirlər. Sakinlər bildirirlər ki, qorxudan gecələr bu binada yata bilmirlər. Bina güclü şəkildə batıb, yükdaşıyan divarlar artıq döşəmə ilə birləşmir. Tavandan daş və suvaq düşür. Onlar düşdüyü acınacaqlı vəziyyətlə bağlı dəfələrlə aidiyyəti strukturlara müraciət etsələr də, nəticəsi olmayıb.
Ev sakinlərinin sözlərinə görə, ərazidə fəaliyyət göstərən “Qold” MMC tikinti şirkəti Bakı Şəhər İcra Hakimiyyəti ilə yeni binanın tikintisi ilə bağlı razılığa gəlib. Daha sonra müvafiq icazələrin alınması üçün Dövlət şəhərsalma və arxitektura komitəsinə müraciət olunub. Lakin problemlə bağlı hələ də heç bir irəliləyiş əldə edilməyib.
Dövlət Şəhərsalma və arxitektura komitəsindən bildirilib ki, məsələ ilə bağlı quruma heç bir müraciət daxil olmayıb. Sözügedən tikinti şirkətindən isə sənədləşmə işlərinin yekunlaşmasını gözlədiklərini vurğuladılar.
Bakı Şəhər İcra Hakimiyyətindən qeyd edildi ki, Nazirlər kabineti tərəfindən qəbul olunacaq qərardan sonra məsələnin həllinə nail olunacaq.
