Dövlət tərəfindən Şuşaya avtobus reyslərin sayı getdikcə artırılır. Buna baxmayaraq, tələbat o qədər yüksəkdir ki, artıq növbəti 3 ay üçün bütün biletlər satılıb. Bu da dələduzların gəlir əldə etmələri üçün yeni fürsətlər yaradır. İnsanların vətənpərvərlik hisslərindən sui-istifadə edilərək saxta turların təşkil olunmasına başlanılıb.
Bu kimi turlardan birinə aldananlar arasında izləyiciləmiz də olub. Onların sözlərinə görə, bir qrup şəxs İnstagram sosial şəbəkəsi vasitəsilə Şuşaya səfər təşkil etdiyini elan edir. Səyahətin vaxtı çatdıqda isə, dedikləri yerdə nə avtobus tapılır, nə də tur nümayəndəsi. Onlarla əlaqə saxlamaq istəyən müştərilər isə bloka atılırlar. Beləliklə, həm puldan, həm də səyahətdən məhrum olurlar.
İddiaların doğru olub-olmadığını yoxlamaq üçün biz də “Şuşa” turundan istifadə etmək qərarına gəldik.
Bizə göndərilən linkə keçid etdik. 12.000-ə yaxın izləyicisi olan “Travel_baku_2022” adlı səhifədə ölkənin bir çox bölgələrinə turların olduğu, ancaq bütün postların eyni gündə paylaşıldığı və ancaq “Şuşa” turunun reklam olunduğu diqqətimizi cəlb etdi. Postlarda şərh bölməsinin bağlı olmağı da şübhəli idi. Elə bil rəy bildirilməyini istəmirdilər.
Onlayn yolla “tur təşkilatçıları”na müraciət etdik. Bizə ən yaxın səfərin 17 iyul tarixində olacağını bildirdilər. Qiymətlər ekonom tur üçün 45, standart (səhər yeməyi daxildir) tur üçün isə 55 manat təşkil edir.
Şəxsiyyəti təsdiq edən heç bir sənəd tələb olunmadan “bileti” əldə etdik və bizə 17 iyul saat 06:30-da metronun “Gənclik” stansiyasının çıxışına gəlməli olduğumuz barədə məlumat verildi.
Qeyd olunan tarixdə bildirilən ünvana gəldikdə nə avtobusu, nə də nümayəndələrdən bir nəfəri tapa bildik. Zənglərimizin cavabsız qalması isə artıq bizi təəcübləndirmədi. İnstagram səhifəsindən də yazmağımıza baxmayaraq, öncə cavab vermədilər, daha sonra bizi bloka atdılar.
Bununla da bizə gələn şikayət öz təsdiqini tapdı.
Sözügedən İnstagram səhifəsi hazırda da fəaliyyət göstərir. Səhifənin adının tez-tez dəyişdirildiyi bildirilir.
Dövlət Avtomobil Nəqliyyatı Xidmətinin sektor müdiri Sübhan Abilov bildirir ki, bu cür turlar saxta olur. İşğaldan azad olunmuş ərazilərə getmək üçün yalnız yolumuzqarabaga.az saytı vasitəsilə bilet almaq mümkündür və bunun üçün şəxsiyyəti təsdiq edən sənəd mütləq sistemə daxil olunmalıdır. Heç bir tur şirkəti özündən bilet düzəldə bilməz.
[URIS id=53209]
[URIS id=53214]
[URIS id=53210]
