Bakı şəhəri, Binəqədi qəsəbəsi, “Ağdamlılar məhəlləsi” adlanan ərazidə yaşayan sakinləri su problemi narahat edir. Bu haqda Bakuplus.az 22 iyul tarixində APA-nın reportajına istinadən xəbər verir.
Sakinlərin sözlərinə görə, bir ilə yaxındır məhəllədə yol qazılıb, yeni su xətləri çəkilib, yeni, smart tipli sayğaclar qoyulub. Amma iki aya yaxındır ki, su verilmir. Səbəb kimi də “Azərsu” ASC sayğaclarda təzyiqin olmamasını göstərir.
Qonşular iddia edirlər ki, su xəbərdarlıq edilmədən kəsilib. Nəticədə də yayın istisində susuz qalan sakinlər öz tələbatlarını ancaq həftədə bir dəfə məhəlləyə gələn su maşınlarından şərikli su almaqla ödəyirlər. Sakinlər onu da deyir ki, su işlətmədikləri təqdirdə, “Azərsu” tərəfindən adlarına borc belə yazılıb.
Bundan başqa, yeni su xətləri çəkilərkən qazılan yol da artıq keçilməz olub. Təxminən bir il əvvəl qazılan yolları işlər bitdikdən sonra belə təmir etməyiblər.
Məsələ ilə bağlı “Azərsu” ASC-nin sözçüsü Anar Cəbrayıllı bildirib ki, artıq məsələ nəzarətə götürülüb və araşdırılacaq: “Həmin ərazidəki evlərin bir hissəsi su alır, digəri almır. Əraziyə Binəqədi Sukanal idarəsinin qəza briqadası cəlb edilib. Suyun hansı səbəbdən verilməməsi ilə bağlı tədbirlər görüləcək. Çox güman ki, oradakı siyirtmələrə özbaşına müdaxilələr var. Elə ona görə də, bəzi evlərə su verilmir. Qaldırılan digər məsələlər də tam araşdırılacaq”.
Anar Cəbrayıllının sözlərinə görə, su xətti çəkilərkən qazılan yol da yenidən təmir olunacaq.
[caption id="attachment_53578" align="alignnone" width="800"]
Foto Apa.az saytı[/caption]
