Bakı Nəqliyyat Agentliyinin (BNA) kameraları tərəfindən cərimələnən sürücü məhkəmədə haqlı çıxdı. Bu haqda BakuPlus.az Avtosfer.az -a istinadən bu gün, 19 may tarixində xəbər verir.
Belə ki, mayın 5-də Bakı Apellyasiya Məhkəməsinin hakimi Faiq Qasımov BNA-nın kamera ilə çəkdiyi cərimələrə xitam verilməsi barədə qərar çıxarıb.
Bundan əvvəl isə vətəndaş onun barəsində tərtib edilmiş BNA qərarlarından Yasamal rayon Məhkəməsinə şikayət etmiş və hakim Rauf Daşdəmirov şikayəti təmin etməyərək qərarları qüvvədə saxlamışdır.
Hakim İnzibati Xətalar Məcəlləsinin 122.1-ci maddəsini və İlham Əliyevin 6 iyul 2018-ci ildə imzaladığı 181 nömrəli fərmanını əsas gətirərək qərar çıxarıb.
Fərmanda deyilir ki, BNA-ya parklanma yerlərində, habelə dayanma və durmanın qadağan edildiyi yerlərdə inzibati xəta törədilməsinə görə protokolların tərtib edilməsi məqsədilə foto və ya videoqeydiyyat funksiyalarına malik xüsusi texniki vasitələrin quraşdırılması təmin edilsin. Bu səbəbdən Yasamal Rayon Məhkəməsinin hakimi cərimənin yazılmasını qanuni hesab edərək qərar çıxarıb.
Şikayətçi tərəf isə hakimin düzgün qərar vermədiyini iddia edərək Apellyasiya məhkəməsinə müraciət edib.
Bakı Apellyasiya Məhkəməsinin qərarında isə qeyd olunur ki, vətəndaşın Bakı Nəqliyyat Agentliyinin 20.12.2021-ci il tarixli, BNA seriyalı, 19575 nömrəli inzibati xəta haqqında qərarının ləğv edilməsi üçün şikayəti əsaslıdır.
Həmin inzibati xətalar bilavasitə aşkar edilməyib. Yəni qərar qəbul etmiş və ya protokol tərtib etmiş səlahiyyətli orqanın nümayəndəsi inzibati xətanın törədildiyi yerdə olmayıb.
İXM-nin 122.1-ci maddəsində həmin Məcəllənin 346.1-ci maddəsi ilə nəzərdə tutulan inzibati xətanın foto və ya videoqeydiyyat funksiyalarına malik xüsusi texniki vasitələrin köməyi ilə aşkar edilməsi nəzərdə tutulmayıb, həmin maddə üzrə belə bir icraatın aparılma qaydası müəyyən edilməyib.
Məhkəmə qeyd edir ki, belə olan halda, sürücünün əməlində törədilməsi ehtimal edilən inzibati xəta üzrə icraat inzibati xətalar qanunvericiliyində nəzərdə tutulmuş qaydada həyata keçirilmədiyindən onun həmin maddə ilə təqsirli bilinib tənbeh edilməsi yolverilməzdir.
Qeyd olunanlara görə məhkəmə hesab edir ki, apellyasiya şikayəti təmin edilməli, Bakı Şəhəri Yasamal Rayon Məhkəməsinin 8 aprel 2022-ci il tarixli qərarı ləğv edilməli, inzibati xəta haqqında iş üzrə icraata İXM-nin 53.2-ci maddəsinə əsasən xitam verilməlidir.
Bir müddət öncə məsələyə münasibət bildirən ekspert Elməddin Muradlı, Yasamal rayon Məhkəməsinin hakimi Rauf Daşdəmirovun çıxardığı qərarın tam əsassız olduğunu bildirmişdir: “Nəhayət, Apellyasiya Məhkəməsinin hakimi Faiq Qasımov qanunun aliliyini sübut edən qərar çıxardı”.
Təxminən 1 ay əvvəl dayanma-durma qaydasının digər hallarının pozulmasına görə sürücülərin kamera vasitəsilə cərimə edilməsi məsələsi Milli Məclisdə müzakirəyə çıxarılıb. Parlamentin qəbulundan və Prezidentin təsdiqindən sonra dayanma-durmaya görə kamera vasitəsilə cərimə yazılması qanuni sayıla bilər.
