Bulvar ərazisində Xəzər dənizinə tökülən mənşəyi bəlli olmayan su şəhər sakinlərini narahat edir. Bu haqda bu gün, 24 may tarixində Bakuplus.az ATV-yə istinadən məlumat verir.
Dənizə axan su köpüklənir, yatağı paslanmış kimi qəribə bir rəng alır. Paytaxt sakinləri bu suyun təhlükəli olduğunu düşünür.
Məsələ ilə bağlı Azərsu ASC-nin mətbuat xidmətinin rəhbəri Anar Cəbrayıllı bildirdi ki, həmin ərazidə dənizə tullantı su axıdılmır. Xəzərə axan çirkab suyun qarşısı 6-7 il əvvəl alınıb. Bütün tullantı su xətləri Bayıl, Bibiheybət və Lökbatan kollektoruna birləşdirilib.
“Həmin sular çirkab suları deyil. Sadəcə ərazidə kükürd olduğundan qrunt sularının qırmızı rəngə çalır. Əvvəllər də oradan su nümunələri götürülüb. Bu gün də bir daha bizim mütəxəssislər baxış keçirdilər, və bir daha təsdiq olundu ki, həmin ərazidən Xəzər dənizinə heç bir çirkab suları axıdılmır”, - deyə Cəbrayıllı əlavə edib.
Ekologiya və Təbii Sərvətlər Nazirliyinin mətbuat katibi İradə İbrahimova isə bildirib ki, məsələ ilə bağlı araşdırma aparılır. Nəticələr barədə ictimaiyyətə məlumat veriləcək.
