Bakının Sulutəpə dairəsinin yaxınlığında, Xocəsən qəsəbəsi istiqamətində gedən yolda yerləşən avtobus dayanacağında sürücülər sərnişinləri mindirə və ya düşürə bilmirlər. Ərazidə “Dayanacaq” nişanı olsa da, sürücülərin dediyinə görə, burada saxlayan avtobuslara cərimələr yazılır. Bu haqda bu gün, 28 iyul tarixində Bakuplus.az Xəzər Xəbərə istinadən məlumat verir.
Bu günə kimi bu dayanacaqdan keçən 102, 157, 158, 259 və 551 saylı avtobuslar ümumilikdə 1100 manat məbləğində cərimə olunub. Sürücülər bu dayanacaqda dayanmaqdan imtina edərək sərnişinlərlə mübahisə etməli olurlar.
Nəqliyyat şirkətləri isə cərimələrə görə bu marşrut avtobuslarının sürücülərinə qeyd olunan dayanacaqda dayanmamaq göstərişini veriblər.
Məsələ ilə bağlı aidiyyəti qurumlara müraciət edildiyi də bildirilir. Amma indiyədək heç kim yazılan cərimələri silməyib və problem həll olunmayıb.
Bakı Nəqliyyat Agentliyindən (BNA) verilən məlumata görə, qeyd olunan ərazidə 5.12, yəni avtobuslar üçün nəzərdə tutulan dayanacaq yerini bildirən nişan quraşdırılıb. Ona görə də bu ərazi 102, 259, 157 və 158 saylı müntəzəm marşrut xətləri üçün dayanacaq kimi tanınıb və təsdiq edilib. Avtobuslar bu nişandan 1 metr arxada və 15 metr qabaqda dayanıb, sərnişinləri düşürüb mindirə bilir.
Baş Dövlət Yol Polisi İdarəsindən (BDYPİ) bildirilib ki, həmin şəxslər məsələ ilə bağlı İdarəyə müraciət edə bilərlər. Onların müraciətinə baxılacaq və problemlərinin həlli üçün qanunvericilik çərçivəsində tədbirlər görüləcək.
[URIS id=54343]
