Hövsan qəsəbəsinin yeni yaşayış massivinin sakinləri içməli su problemindən əziyyət çəkirlər. Bu haqda 31 may tarixində Bakuplus.az Realtv -yə istinadən məlumat verir.
Sakinlərin sözlərinə görə, su daxil kommunal xərclərə ayrılan vəsait ailə büdcəsinin 3/4 hissəsini təşkil edir ki, bu da digər xərcləri qarşılamağa kifayət etmir. Suya olan tələbat aztəminatlı ailələrin vəziyyətini bir qədər də çətinləşdirir. Sakinlər məcbur olub hayətlərində su quyuları qazıblar, lakin uşaqlar, quyu suyu şor olduğundan, onu içmək istəmirlər. Şor su ilə yuyunan körpələrin bədənində isə yaralar əmələ gəlir.
Hövsan sakinlərinin su problemi ilə bağlı Azərsu ASC bildirib ki, Yeni yaşayış massivində heç bir infrastruktur mövcud deyil. Həmin ərazidə mərkəzləşdirilmiş su təchizat sistemləri qurulmayıb. Yeni massivlə bağlı gələcəkdə layihələrin icra olunması Abşeron yarımadasının baş planı olan master-plana salınacaq. Gələcəkdə həmin ərazidə mərkəzləşdirilmiş su sisteminin qurulması işləri həyata keçiriləcək.
