Bakının Suraxanı rayonu, Hövsan qəsəbəsində yerləşən çimərliyə kanalizasiya tullantıları atılır. Bu haqda Bakuplus.az 8 iyun tarixində Baku TV-nin reportajına istinadən xəbər verir.
Buna səbəb kanalizasiya tullantılarının yığılması üçün lazımi infrastrukturun olmaması olub. Bunu “Azərsu” ASC-nin mətbuat xidmətinin rəhbəri Anar Cəbrayıllı deyib.
Qeyd olunur ki, məhz Hövsan kəndində bütün şəhərin kanalizasiyasını təmizləmək üçün paytaxtın ən böyük mərkəzi aerasiya stansiyası yerləşir.
Oxşar vəziyyət Bakının bir çox yerində, o cümlədən Şüvəlan, Bilgəh, Türkan və s. qəsəbələrindəki çimərliklərdə müşahidə olunur.
Bununla bağlı ən acınacaqlı vəziyyət Şıx qəsəbəsində, Badamdar, 20-ci sahə və Bibiheybət qəsəbələrinin kanalizasiya tullantılarının birləşdiyi çimərlikdə müşahidə olunur.
Gigiyena və Epidemiologiya Mərkəzinin şöbə müdiri Ziyəddin Kazımovun sözlərinə görə, həmin ərazilərdə mütamadi olaraq monitorinqlər keçirilir. Bu çimərliklər, suda bakteriyaların miqdarı baxımından sağlamlıq üçün ən təhlükəli çimərliklər sırasında olmasına baxmayaraq, hələ də Bakı sakinlərinin yay tətili üçün ən populyar yerləri olmaqda davam edir.
[caption id="attachment_47757" align="alignnone" width="800"] Foto Baku TV rəsmi saytı[/caption]
