Şəhid ailələri və qazilər yeni açılmış marşrut xəttindən pulsuz istifadə edəcəklər. Bu haqda 15 iyun tarixində Oxu.az məlumat verib.
Qarabağ bölgəsinə sərnişindaşıma fəaliyyətinin genişləndirilməsi çərçivəsində iyunun 25-dən etibarən Bakı - Füzuli - Bakı şəhərlərarası müntəzəm avtobus marşrutu istifadəyə verilir. Reyslər həftədə bir dəfə olmaqla, şənbə günləri təşkil ediləcək. İlkin mərhələdə sərnişinlər Merdinli kənd məscidi, Füzuli şəhər mərkəzi və Füzuli Beynəlxalq Hava Limanını ziyarət edə biləcəklər. Növbəti mərhələdə isə İbə piri, Qaraməmmədli bulağı, Qarğabazar Karvansaray kompleksi və Dövlətyarlı kəndinə də (Ağıllı kənd) getmək mümkün olacaq. Dini, mədəni və tarixi abidələri ziyarət edərkən vətəndaşları bələdçilər müşayiət edəcək.
Vətəndaşlar iyunun 17-dən etibarən www.yolumuzqarabaga.az portalı vasitəsilə onlayn bilet ala bilərlər. Vətən müharibəsi qəhrəmanları, Milli qəhrəmanlar, şəhid ailələrinin üzvləri və Qarabağ müharibəsi əlilləri üçün bu istiqamət üzrə pulsuz bilet almaq imkanı yaradılıb.
