Protez-Ortopedik Bərpa Mərkəzində əlləri olmayan protez ustası çalışır. Bu haqda bu gün, 3 iyun tarixində Bakuplus.az Baku TV-yə istinadən xəbər verir.
Nazim Əliyev 28 yaşında elektrik vurması nəticəsində hər iki qolunu itirib. O, Bakıda özünə taxılan protezin keyfiyyətsiz olduğuna görə sovet dövrünün ən yaxşı protez ustalarının olduğu Leninqrad (Sankt-Peterburq) şəhərinə yollanıb. Oradakı həkimlərin onun protezinə güldüyünü görən Nazim bundan çox təsirlənib və bu sahəni öyrənəcəyinə söz verib.
68 yaşlı usta artıq 35 ildir bu peşə ilə məşğuldur və Bakının ən yaxşı protez ustalarından biridir. Onun bir il ərzində 250 protez hazırladığı vaxtları olub. Ustanın iki cüt protezi var. Biri ilə iş görür, digərindən isə gündəlik həyatında istifadə edir.
“34 yaşında evlənmişəm. O zaman bilirdim ki, öz ailəmi özüm dolandıracam. Protezlə edə bilmədiyim heç nə yoxdur. Edə bilmədiyim yeganə şey köynəyimin düyməsini açmaqdır”, - usta fikrini bölüşüb.
Qarabağ əlilləri belə Nazim Əliyevdən ilhamlanır, ona baxdıqdan sonra protezlərin istifadəsinə qərar verirlər.
[caption id="attachment_47206" align="alignnone" width="800"]
Foto Baku TV rəsmi saytı[/caption]
