Bu gün, avqustun 5-i saat 11:00-da 2022-2023-ci tədris ili üzrə məktəbəhazırlıq qruplarına qəbul başlayıb. Qəbul prosesi ərazi prinsipi ilə aparılacaq. Bu haqda Bakuplus.az məlumat verir.
Qeydiyyat 5 yaşında olan uşaqlar üçün nəzərdə tutulub. Yerləşdirmə prosesi Azərbaycan bölməsi üzrə avqustun 8-dən, tədris digər dillərdə aparılan bölmələr üzrə isə avqustun 11-dən başlanılır. Qeydiyyat prosesi 14 sentyabr 2022-ci il tarixində yekunlaşacaq.
Bu il qəbul prosesi www.mektebeqebul.edu.az elektron portalı vasitəsilə aparılacaq.
Təhsil Nazirliyi paytaxtda daimi qeydiyyatı olmayan vətəndaşların uşaqları üçün Bakı məktəblərində xüsusi qeydiyyat prinsipi təqdim edib. Qeyd olunur ki, ilk növbədə məktəbə yaxın ərazidə qeydiyyata alınan uşaqlar qəbul ediləcək. Yer çatışmadığı halda, yaşayış yerlərində qeydiyyatı olmayan uşaqların valideynlərinə başqa məktəblərdə vakant yerlər tövsiyə ediləcək. Kirayə mənzillərdə yaşayanlar da uşaqlarını ərazi prinsipi tətbiq olunmayan hər hansı məktəbdə qeydiyyatdan keçirə bilərlər.
Daha öncə, 26 iyul tarixində, Bakıda yerləşən bağçalara elektron qəbul başlayıb.
