Yeni məktəbli formalarının tikilməsi üzrə işlər atrıq yekunlaşır və avqustun 16-dək bu formalar satışa çıxarılacaq. Bu haqda bu gün, 12 avqust tarixində Bakı Tikiş Evinin (BTE) satış şöbəsinin müdiri Etibar Əzimova istinadən Report məlumat verib.
Bu tədris ilindən etibarən geyim forması aşağıdakı qış və yay formalarından ibarətdir:
Qızlar üçün yay forması - üçdüyməli qısaqol köynək və ətək;
Oğlanlar üçün yay forması - üçdüyməli qısaqol köynək və şalvar;
Qızlar üçün qış forması - üçdüyməli uzunqol köynək, ətək və ya şalvar, önü bağlanılan cibli jaket;
Oğlanlar üçün qış forması - üçdüyməli uzunqol köynək, şalvar və önü bağlanılan cibli jaket.
Əzimovun sözlərinə görə, məktəbli formaları Bakı Tikiş Evində tikilir: "Məktəbli formaları pambıq parçadan tikilir. Qiymətlərə gəlincə isə, ötən illərlə müqayisədə qiymətlərdə fərq hiss olunacaq. Geyimləri Bakı Tikiş Evi ilə yanaşı, paytaxtda fəaliyyət göstərən "Bravo" supermarketlər şəbəkəsindən də əldə etmək mümkün olacaq".
