Bir müddət əvvəl sərnişinlərin ictimai nəqliyyat vasitələrində pulsuz Wi-Fi-dan istifadə edə biləcəkləri barədə məlumat verilmişdir. Lakin bu xidmətin bir neçə aydır fəaliyyət göstərməsinə baxmayaraq, sərnişinlər hələ də bundan yararlana bilmirlər. Bu haqda APA TV reportaj təqdim edib.
“BakuBus”-ın sərnişinləri qeyd edir ki, internetdən istifadə etmək mümkün deyil, qoşula bilənlər isə sürətdən şikayətlənirlər.
“BakuBus” MMC-dən isə mövzu ilə bağlı bildirdilər ki, hazırda qurumun istismarında olan 5 və 7A nömrəli marşrut xətləri üzrə hərəkət edən avtobuslarda pulsuz Wi-Fi var. Bu avtobuslarda digər qurumla birlikdə həyata keçirilən özəl ictimai tərəfdaşlıq çərçivəsində aprel ayından pulsuz Wi-Fi xidməti sınaq şəklində qoşulub. Hazırda bu sahədə qarşıya çıxan çətinliklərin aradan qaldırılması, o cümlədən avtobuslardan istifadə edən sərnişinlərin daha sürətli internetlə təmin olunması istiqamətində iş aparılır. Yaxın vaxtlarda avtobusların daha sürətli internetlə təchiz olunması nəzərdə tutulur.
Marşrutlarda pulsuz Wi-Fi xidməti olan özəl şirkətlərdən "Xaliq Faiqoğlu"-nun istismarında olan 18, 61, 65 saylı marşrut xətlərində vaxtikən sözügedən xidmət olub. Lakin indi aktiv deyil.
Nəqliyyat üzrə ekspert Elməddin Muradlı deyir ki, avtobus kart sistemi, dayanacaqlara vaxtında çatma və digər problemlərin yaşandığı bir vaxtda marşrutlarda Wi-Fi xidmətinin təkmilləşdirilməsi istiqamətində işləri gözləmək absurddur.
Rabitə və Yüksək Texnologiyalar Nazirliyindən isə bildirdilər ki, avtobuslardakı Wi-Fi şəbəkəsində sürətin zəif olması qurumla bağlı bir məsələ deyil, və Bakı sakinlərinə vəd edilmiş xidmətdən nə vaxt istifadə edə biləcəkləri ilə bağlı heç bir şərh verə bilmirlər.
