Bakı məktəblisi Şükran Mikayılzadə Türkiyə universitetinə qəbul imtahanlarında rekord bal toplayıb. Bu haqda məlumatı Bakuplus.az 16 iyun tarixində Ölkə.az-a istinadən verir.
Bakı Slavyan Universitetinin məktəb-liseyinin 11-ci sinfini bitirən Şükran Marmara Universitetinə qəbul imtahanında 98,43 bal toplayıb. Bu dünya rekordudur. Beləliklə, dünyanın müxtəlif ölkələrindən Marmara Universitetində imtahan verənlər arasında ən yüksək nəticəni Şükran Mikayılzadə göstərib.
Şükranın atası Mühəndis Mikayılov isə Qarabağ qazisidir.
Məktəb illərində Şükran alman, ingilis, rus, türk və Koreya dillərini öyrənib. O, həkim olmaq üçün Türkiyədə təhsil almaq niyyətindədir.
Şükranın anası qeyd edib ki, qızının daxil olduğu universitetdə illik təhsil haqqı kifayət qədər yüksəkdir: "Həmin universitet Türkiyənin sayılıb-seçilən ali təhsil müəssisələrindən biridir. Azərbaycandan cəmi bir nəfər ən yüksək bal toplayan şəxs qəbul edilir. Təhsil haqqının ödənilməsi üçün dövlət proqramına da müraciət edəcəyik".
