Respublikanın ümumtəhsil məktəblərində 1-ci sinfə uşaqların qəbuluna başlanılıb. Lakin bəzi valideynlər siniflərdə yer olmadığına görə övladlarını rus sektoruna yerləşdirə bilmədiklərindən şikayətlənirlər. Bu haqda Bakuplus.az 7 iyul tarixində ATV Xəbər-in reportajına istinadən xəbər verir.
Kanala müraciət edən valideynin sözlərinə görə, övladının yaşadığı ünvanın yaxınlığında Nizami rayonu, 229 saylı məktəbin rus bölməsi üzrə birinci sinfə qeydiyyat üçün müraciət etsə də, dəfələrlə imtina cavabı alıb. Onun sözlərinə görə, müvafiq qurumlar bunun səbəbini şagird limitinin bitməsi ilə izah edir. Bu halda vətəndaş yaxın ərazidəki digər məktəbə müraciət etməli olur.
Müvafiq internet səhifəsində 229 saylı məktəbin rus bölməsində siniflərin dolu olduğu görünür. Rayonun rus sektoru olduğu digər təhsil müəssisəsi - 145 saylı məktəbdə isə bu bölmədə 3 müəllimin olduğu göstərilir. Amma yenə imtina cavabı gəlir. İmtina bu məktəbin uşağın yaşadığı zonadan kənarda olması ilə izah olunur.
Bakı şəhər üzrə təhsil idarəsindən bildirildi ki, valideynlər 229 saylı məktəbə müraciət etməlidir. Məktəbin uşağı qəbul etməkdən imtina etməsi ilə bağlı izahatdan sonra konkret cavab verilməyib.
Rus bölməsi üzrə 1-ci sinfə qəbul zamanı müsabiqədən uğurla keçən uşaq niyə məktəb tapa bilmir sualı ilə Təhsil Nazirliyinin sekor müdiri Cəsarət Valehovaya müraciət olunub. Nazirliyin nümayəndəsi Azərbaycan sektoruna qəbul olmağı təklif edib. Jurnalistlər qeyd ediblər ki, uşaq artıq rus sektorunda təhsil almaq üçün müsabiqədən keçib. Məmur bu problemi həll edəcəyini vəd edib. Məsələ mətbuatın nəzarətində olacaq.
