Havaların isinməsi ilə birlikdə avtobuslardakı kondisioner problemi yenidən gündəmə gəlib. İstər şəhərdaxili, istərsə də qəsəbələrə sərnişindaşıma ilə məşğul olan köhnəlmiş nəqliyyat vasitələrinin əksəriyyətində kondisioner yoxdur. Bu haqda 24 iyun tarixində Xəzər Xəbər reportaj hazırlayıb.
Sərnişinlərin sözlərinə görə, bu problem isti havalarda onlar üçün dözülməz vəziyyət yaradır. Sürücülər isə çıxış yolunu xəttə yeni avtobusların buraxılmasında görürlər.
Bakı Nəqliyyat Agentliyinin mətbuat katibi Mais Ağayev Xəzər Xəbərə bildirdi ki, Bakıda avtobus parkının yenilənməsi ilə bağlı daşıyıcı şirkətlərə tapşırıq verilib.
“Müntəzəm sərnişindaşımalara cəlb edilən avtobuslarda sərinləndirmə sistemlərinin olması tələb olaraq müəyyən edilib. Ötən dövrdə avtobus parkının yenilənməsi çərçivəsində paytaxta gətirilən avtobusların hər birində bu sistem mövcuddur. Bugünkü istismarda olan avtobusların da 50 faizə yaxın hissəsi artıq yenilənmiş müasir avtobuslarla əvəz edilib.
Ümumiyyətlə soyutma sistemi olmayan avtobusların istismardan çıxarılmasına gəlincə, bu, fasiləsiz sərnişin axını baxımından doğru deyil. Belə bir fasilə yalnız yeni avtobuslarla mərhələli şəkildə dəyişdirilməklə aradan qaldırıla bilər. Bu istiqamətdə tərəfimizdən də iş aparılmaqdadır”, - deyə Mais Ağayev bildirib.
[caption id="attachment_49875" align="alignnone" width="800"] Foto Xəzər Xəbərin rəsmi Youtube kanalı[/caption]
