Suraxanı rayonunda özünü şəhid qardaşı kimi təqdim edən şəxs həbs olunub. Bu haqda 28 iyul tarixində Report məlumat verib.
Son günlər özünü şəhid qardaşı kimi təqdim edən Elnur Həsənov adlı şəxs kanallara müsahibələr verərək iddia edib ki, onu polis bölməsinə əsassız aparıblar və orada döyüb, təhqir ediblər.
"Elnur Həsənovun dedikləri tamamilə yalandır, polisi öz qanuni hərəkətlərindən çəkindirmək və törətdiyi qanunazid əməlləri ört-basdır etmək məqsədi daşıyır”, - Daxili İşlər Nazirliyinin Mətbuat Xidmətinin bölmə rəisi Zeyni Hüseynov deyib.
Belə ki, Qaraçuxur qəsəbə sakini, gənc qadın A.K. polisə müraciət edərək, Elnur Həsənovdan şikayət edib. O bildirib ki, uzun müddətdir uzaq qohumu olan Həsənov dəfələrlə ona evlilik təklifi edib, lakin hər dəfə rədd cavabı aldıqda onu narahat edib və razılaşmayacağı təqdirdə onu ölümlə hədələyib.
Qadın, həmçinin ərizələrində qeyd edib ki, Elnur Həsənov ona, ögey qardaşının şəhid olduğunu bildirib və buna görə də heç kimdən qorxmadığını deyib. Müraciətlərdən sonra Elnur Həsənov polis orqanlarına dəvət edilib, onun barəsində profilaktiki və inzibati tədbirlər görülüb. Amma tədbirlərdən nəticə çıxarmayan Həsənov A.K.-nın təqibini davam etdirdiyinə görə, qadın növbəti dəfə Nəsimi Rayon Polis İdarəsinə müraciət edərək artıq intihar həddinə çatdığını bildirib.
Elnur Həsənov saxlanılıb və barəsində 1 ay müddətinə inzibati həbs tənbehi seçilib.
