Xəbər verdiyimiz kimi, dövlət poliklinikalarında həkim otaqlarında məişət əşyalarının istifadəsinə məhdudiyyət qoyulduğu iddia edilib.
Məsələ ilə bağlı TƏBİB Bakuplus.az-ın sorğusuna cavab olaraq bildirib ki, tibb işçiləri və pasiyentlərin təhlükəsizliyinin hər zaman prioritet məsələlərdən biri olduğunu nəzərə alaraq bu istiqamətdə davamlı təhlükəsizlik tədbirləri həyata keçirilir:
"Yanğın təhlükəsizliyinin təmin olunması istiqamətində görülən tədbirlər Azərbaycan Respublikasının "Yanğın təhlükəsizliyi haqqında" Qanunu və "Səhiyyə obyektlərində yanğın təhlükəsizliyinə əməl olunması qaydaları"nın (Qaydalar) tələblərinə uyğun olaraq aparılır.
Qeyd olunan Qaydaların 2.14-cü bəndinə əsasən, su qaynadanların, su qızdırıcıların və su qaynatmaq üçün xüsusi qurğulu çənlərin quraşdırılmasına yalnız mətbəxlərdə və ya bu məqsədlər üçün nəzərdə tutulmuş otaqlarda icazə verilir. Bu baxımdan, tibb müəssisələrinin iş otaqlarında fəaliyyət yanğın təhlükəsizliyi tələbləri nəzərə alınmaqla tənzimlənir və elektrik çaydanları, elektrik qızdırıcıları, soba və digər analoji məişət avadanlıqlarının istifadəsinə yol verilmir".
Qurumdan bildirilib ki, tibb müəssisələrinin bütün əməkdaşları yanğın və elektrik təhlükəsizliyi qaydalarını bilməli və onlara ciddi riayət etməlidirlər:
"Klinika, poliklinika, doğum evləri, dispanserlər, xəstəxanalar və digər səhiyyə müəssisələrində yanğın təhlükəsizliyinin təmin olunmasına görə məsuliyyət həmin müəssisələrin rəhbərlərinin üzərinə düşür. Müəssisə rəhbərləri təhlükəsizlik qaydalarının icrasını təmin etməli və əməkdaşlar tərəfindən bu qaydalara riayət olunmasına nəzarət etməlidirlər".
06.09.2026
***
Dövlət poliklinikalarında həkim otaqlarında məişət əşyalarının istifadəsinə məhdudiyyət qoyulduğu iddia edilir.
Bununla bağlı Bakuplus.az-ın redaksiyasına poliklinikalarda çalışan tibb işçilərindən müraciətlər daxil olub.
İddia olunur ki, Tibbi Ərazi Bölmələrini İdarəetmə Birliyinin (TƏBİB) yeni rəhbərliyi dövründə həkim otaqlarında istifadə edilən çaynik, fincan və digər məişət əşyalarının yığışdırılması ilə bağlı göstəriş verilib.
Tibb işçilərinin sözlərinə görə, bu tələb bəzi səhiyyə müəssisələrində narazılıqla qarşılanıb.
Şikayətçilər bildirirlər ki, həkim otaqlarında çay və digər isti içkilərin hazırlanması üçün istifadə olunan avadanlıqların saxlanılmasına məhdudiyyət tətbiqini nəzərdə tutan qərarın səbəbləri və hüquqi əsasları barədə əməkdaşlara hər hansı rəsmi izahat verilməyib.
Qeyd edək ki, məsələ ilə bağlı TƏBİB-ə sorğu ünvanlanıb. Lakin suallarımız cavabsız qalıb.
Firuzə Babayeva
