Son zamanlar sosial şəbəkələrdə Bakı və Abşeronun müxtəlif çimərliklərinə getdikdən sonra qəfil halsızlıq hiss edən uşaqların valideynlərindən məlumat yayılıb. Xüsusilə uşaqlarda qusma, halsızlıq, ağrılar, o cümlədən qulaqlarda, iştahsızlıq müşahidə olunur. Bu haqda bu gün, Kliniki Tibbi Mərkəzin İctimaiyyətlə əlaqələr bölməsinin müdiri Elnur Hidayətoğlu öz Facebook səhifəsində paylaşım edib.
Həkimlər bunun çirklənmiş çimərliklərdə çimərkən dəniz suyunu udmağın nəticəsi ola biləcəyini deyirlər.
Məsələ ilə bağlı Kliniki Tibbi Mərkəzin toksikoloqu İnci Bağırova bildirib ki, hər il çimərlik mövsümü başlamazdan əvvəl çimməyə icazə verilən və ya qadağan olunan çimərliklərin siyahısı dərc olunur.
“Belə ərazilərdə dəniz suyunun tərkibində toksikoloji baxımdan ağır metallar, neft qalıqları olur. Ümumiyyətlə, çirkli dəniz suyu insanda qusma, ürəkbulanma, bağırsaq pozğunluğu, ishal, iştah pozğunluğu, başgicəllənmə və baş ağrısı kimi hallara səbəb ola bilir. Belə olan halda xəstəni mütləq həkimə aparmaq lazımdır”, - deyə həkim bildirib.
Rəsmi məlumatlara görə, Şıx və Sahil, Pirşağı, Hövsan və Türkan kəndlərində çimərliklərdə su mikrobioloji çirklənmənin sanitar normasını dəfələrlə üstələyir.
