Paytaxtda yol kənarlarında albalı, qoz, nar və digər meyvə ağacları bitir. Tələbat olmadığına görə, bu meyvələr ya israf olur, ya da tökülüb ətrafı çirkləndirir. Bu haqda reportaj ARB24 hazırlayıb.
Məhlə aralarında ya da yol kənarlarında müxtəlif növ meyvə ağaclarına rast gəlmək mümkündür. Həmin meyvələrdən ya o ərazidə yaşayan sakinlər, ya da ki yoldan keçən insanlar bir iki dənə yeməklə kifayətlənirlər. Amma yerdə qalan meyvə tökülərək israf olur. Onlar arasında tut xüsusi yer tutur. O, yerə tökülüb israf olmaqla yanaşı, eyni zamanda ətrafı da çirkləndirir.
Meyvələrin praktiki istifadəsi ilə bağlı sualı Kənd təsərrüfatı üzrə ekspert Cəfər İbrahimli cavablandırıb. Onun sözlərinə görə, məhlə aralarında və ya yol kənarında yetişən bu cür meyvə ağaclarının emal həcmi çox kiçikdir və ciddi iqtisadi potensiala malik deyil.
Meyvəçilik və çayçılıq elmi tədqiqat institutunun direktoru İlham Qurbanov isə şifahi olaraq bildirb ki, yol kənarında yetişən meyvələrin toplanıb istehsala göndərilməsinin mümkünlüyünü xüsusi yoxlanışdan sonra təyin etmək olar. Amma ümumilikdə bu meyvələrin istifadəsi gigiyenik cəhətdən məqbul sayılmır. Çünki avtomobillərdən havaya buraxılan qazlar həmin meyvələrin üzərinə hopur. Bu da olduqca təhlükəlidir. Bununla belə, qabıqlı olduğundan, qoz, şabalıd kimi meyvələr istehsala yönəldilə bilər.
