Bakıda 25 nəfəri gün vurub. Bu haqda 18 iyul tarixində modern.az məlumat verib.
Günvurma ilə bağlı Bakı Şəhəri Təcili və Təxirəsalınmaz Tibbi Yardım Stansiyasına 25 nəfər müraciət edib. Onlardan 17 nəfəri hospitalizasiya edilib, 8 nəfərə isə yerində yardım göstərilib. Müraciət edənlərdən 19-u böyük, 6-sı uşaq olub.
Şiddətli gün və ya isti vurma zamanı tibbi yardıma ehtiyac olur. Çünki həkimlər infarkt, insult və digər ciddi nəticələrin qarşısını ala bilərlər.
Təcili yardım gəlməmişdən əvvəl aşağıdakı ilk tibbi yardımı göstərməlisiniz:
- Zərərçəkəni kölgəyə və ya sərin bir otağa aparmalı, başını qaldıraraq uzandırmalısınız;
- Paltarını çıxarmalı, kəmərini boşaltmalısınız;
- Başına soyuq kompres qoymalı, ürək nahiyəsindən başlayaraq bədənini soyuq su ilə silməli və ya nəmli bir çarşab ilə bürüməlisiniz;
- İnsana su içirməli, huşunu itirərsə, ammonyakı (naşatır spirti) burnuna yaxınlaşdırıb nəfəs almasını təmin etməli, daha sonra isə zərərçəkəni yan üstə çevirməlisiniz;
- Sadalananları etdikdən sonra təcili yardım çağırmalısınız.
İnsanın nəfəsi kəsildiyi və nəbzi əl ilə yoxlanıla bilmədiyi halda, dayanmadan süni nəfəs verilməli, qapalı ürək masajı edilməlidir.
