Bakı Ağır Cinayətlər Məhkəməsində falçı kimi tanınan Sevinc Kərimovaya hökm oxunub. Bu haqda BakuPlus.az Qafqazinfo-a istinadən bu gün, 18 avqust tarixində xəbər verir.
Kərimova dələduzluq və rüşvət vermə əməllərində təqsirləndirilir.
Araşdırmalar zamanı məlum olub ki, S.Kərimova biznes fəaliyyəti ilə məşğul olan şəxsdən onun xaricdən gətirdiyi malları gömrük rüsumundan yayındıracağını bildirərək 50 000 manatını ələ keçirib.
O, həmçinin həbs edilmiş Fərrux Bayramov adlı şəxsin azadlığa buraxılmasını təşkil edəcəyini vəd edərək onun yaxınlarının 29 000 manat rüşvət verməsinə vasitəçilik və təhrik edib.
S.Kərimova onu müalicə edən həkimə isə yalandan vəd verərək dayısının Bakıda və Xırdalanda çoxmərtəbəli binalar tikdiyini bildirib. O, həmin həkimdən və oğlundan evin alınması üçün ümumilikdə 43 000 manat alıb. Həmin pulun 15 000 manatı isə həkimin yeni evlənmiş Elvin adlı oğlunun toyundan yığılan vəsait olub. Lakin sonradan həmin şəxslərin adına heç bir əmlakın sənədləşdirilmədiyi, S.Kərimovanın bütün pulları mənimsədiyi üzə çıxıb.
Tərtər rayon sakini, 51 yaşlı S.Kərimova qeyd edilən əməllərdə təqsirli bilinərək 6 il 6 ay müddətinə həbs cəzasına məhkum edilib.
