Bakıda vətəndaşların 300 min manata yaxın pulunu mənimsəyən şəxslərə hökm oxunub. Bu haqda 1 iyul tarixində Qafqazinfo məlumat verib.
Əvvəllər bir sıra qurumlarda yüksək vəzifələrdə çalışmış Niyazi Qədimov 2019-cu ildə təsadüfən taksidə olarkən sürücü Vüsal Rzayevlə tanış olub. Vüsal ona yüksək vəzifəli şəxslərlə yaxın əlaqələrinin olduğunu bildirib. Bundan sonra dostluq münasibətləri yaranan Niyazi və Vüsal birlikdə müxtəlif şəxsləri işə düzəltmək adı ilə onlardan ümumilikdə 294.500 manat pulu alaraq ələ keçiriblər.
Saxlanılan şəxslər Cinayət Məcəlləsinin “Dələduzluq” maddəsinin bir neçə bəndi ilə təqsirləndiriliblər. Bakı Ağır Cinayətlər Məhkəməsinin hökmü ilə Niyazi Qədimov 8 il, Rzayev isə 4 il 6 ay müddətinə həbs cəzasına məhkum ediliblər.
