Bakıda çantasını taksi sürücüsü ilə başqa ünvana göndərən müştəri problem yaşayıb. Bu haqda 19 avqust tarixində Oxu.az məlumat verib.
“Bolt” şirkətinin xidmətindən istifadə edən Bakı sakini iddia edir ki, sürücü narkotik təsiri altında olub:
“Şirkətin kuryer xidmətindən istifadə etdim və lazımi ünvana çanta göndərdim. Bir saatdan çox vaxt keçdi, ancaq çanta ünvana çatdırılmadı. Sürücüyə zəng vurdum, cavab vermədi. Narahat olub, proqramdan harada olduğuna baxdım və gördüm ki, maşını dairəvi yolda saxlayıb. Başqa bir taksi sifariş edərək həmin yerə getdim. Görürəm ki, adam “hallanıb”, özündə deyil, yanında da şpris var. Nə etdiyini soruşdum, mənə: “Gedirəm də, yoldayam, uçuram”, - cavabını verdi”.
Məsələ ilə bağlı “Bolt” şirkətinin Azərbaycandakı mətbuat xidmətinin rəhbəri Viktoriya Prilutska bildirib ki, sürücülər şirkət tərəfindən işə götürülmür, onlar platformadan istifadə edən müstəqil tərəfdaşlardır. Lakin bu fakt təstiqini tapsa, həmin sürücü blok olunacaq və o, bir də tətbiqə qoşulub sürücü kimi fəaliyyət göstərməyəcək.
