Bakıda “Oscar” idman zalında sevgilisini bıçaqlayan qadının məhkəməsi yekunlaşıb. Bu haqda 30 iyul tarixində Qafqazinfo məlumat verib.
Ötən il baş vermiş cinayət hadisəsinin materialları Bakı Ağır Cinayətlər Məhkəməsində araşdırılıb. Məhkəmədə dindirilən Xatirə Cabbarova (şərti) özünü qismən təqsirli bilib:
“Həyat yoldaşımdan boşanmışam, 2 uşağım var. “Pub”-da xidmətçi kimi işləyəndə evli oğlanla tanış oldum və daha sonra onunla qeyri-rəsmi ər-arvad kimi yaşamağa başladım. O, “Oscar” idman zalında işləyirdi və onunla orada qalırdıq. O, məni qısqanırdı. Bir dəfə zalda olanda qısqanclıq zəminində dırnaqlarımın boyalı olduğunu, işdən gec çıxdığımı səbəb gətirərək məni vurdu. Mən də, əsəbləşərək otaqdakı bıçağı götürərək kürəyindən bir dəfə vurdum. Zaldakıların köməyi ilə onu təcili yardım maşınına mindirib xəstəxanaya apardıq”.
Məhkəmədə zərərçəkmiş T.Qədimov bildirib ki, 2-3 ilə yaxın təqsirləndirilən şəxslə qeyri-rəsmi münasibətləri olub:
““Oscar” idman zalında öz istirahətim üçün şəxsi otaq düzəltmişdim. Aramızda qısqanclıq zəminində tez-tez mübahisələr olurdu. Sonuncu dəfə orada Xatirədən dırnaqlarının niyə boyalı olduğunu soruşdum. O da, qışqırıb söyüş söyərək yaxşı etdiyini və burada heç nə olmadığını bildirdi. Bu zaman əsəbiləşib onu itələdim. Ağlayaraq qışqırmağa başladı, mən onu qucaqladım. Bu zaman kürəyimdən bıçaqladı".
Hadisədən sonra tərəflər barışıb və T.Qədimov qadından şikayətçi olmayıb. Bunu nəzərə alan məhkəmə qadına şərti cəza verib.
