Abşeron rayonu, Xırdalan şəhərində yaşayış binasında 3 avqust tarixində baş verən partlayış nəticəsində 4 nəfər xəsarət alıb. Bu haqda 4 avqust tarixində Bakuplus.az məlumat verir.
Partlayış beşmərtəbəli yaşayış binasının üçüncü mərtəbəsində qaz sızması nəticəsində baş verib. Hadisə yerinə Fövqəladə Hallar Nazirliyinin qrupları və təcili yardım əməkdaşları cəlb olunublar. 36 və 41 yaşlı iki kişi baş, boyun, hər iki yuxarı və aşağı ətrafların ikinci və üçüncü dərəcəli termiki yanıq xəsarətləri ilə Nərimanov Tibb Mərkəzinə yerləşdirilib. Hər ikisinin vəziyyəti ağır stabil kimi qiymətləndirilir.
Həmçinin digər iki kişidən biri barotravma, biri isə tüstüdən boğulma səbəbi ilə Kliniki Tibbi Mərkəzə yerləşdirilib. Onlardan biri müalicə olunduqdan sonra evə buraxılıb, 31 yaşlı kişi natamam yanıq məhsulları ilə zəhərlənmə diaqnozu ilə Kliniki Tibbi Mərkəzə yerləşdirilib. Vəziyyəti orta ağır olaraq qiymətləndirilir.
Hadisə ilə bağlı aidiyyəti qurumlar tərəfindən araşdırma aparılır.
