Bakının Nərimanov rayonunda qardaşlar arasında yaşanan mübahisə cinayətlə nəticələnib.
Demokrat.az xəbər verir ki, hadisə bu ilin iyulun 28-də baş verib. Bakı şəhər sakini, 1974-cü il təvəllüdlü Eldar həmin gün axşam saatlarında yaşadıqları ünvanda qardaşı Ehtiramla onun arvadının ünvanına nalayiq ifadələr işlətməsi səbəbindən mübahisə edib.
Aralarında yaranmış mübahisə zamanı o, yumruqla qəsdən qardaşının başından və bədəninin digər nahiyələrindən vuraraq ona müxtəlif dərəcəli bədən xəsarətləri yetirib.
Hadisəni törədən Eldarın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Bu işə Nərimanov Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıq əldə edib. Zərərçəkən ona qarşı şikayətini geri götürüb.
Məhkəmənin hökmü ilə təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.
