Suraxanı Rayon Məhkəməsində qəsdən sağlamlığa yüngül zərər vurmada təqsirləndirilən Tapdıq Əsədovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Namiq Kərimovun sədrliyi ilə keçirilən prosesdə hökm oxunub.
Hadisə 23 oktyabr 2025-ci il tarixdə, saat 00:30 radələrində paytaxtın Suraxanı rayonu ərazisində baş verib.
İttihama görə, Tapdıq Əsədov həmin vaxt yaşadıqları evdə qızı, zərərçəkmiş Günay Əsədovanın (adı, soyadı şərtidir) işdən gecə saatlarında qayıtmasına etiraz edib. Qızı isə ona cavab qaytararaq sərbəst yaşamaq istədiyini bildirib. Bu, tərəflər arasında gərgin mübahisəyə səbəb olub.
Mübahisənin gedişində ata əsəbiləşərək qəsdən əlilə qızının baş və bədəninin müxtəlif nahiyələrinə bir neçə dəfə zərbə endirib. Zərbələr nəticəsində Günayın müxtəlif nahiyələrində qançırlar əmələ gəlib.
Hadisədən sonra Tapdıq Əsədov saxlanılaraq cinayət məsuliyyətinə cəlb edilib.
Məhkəmənin hökmü ilə o, zərərçəkmiş şəxslə barışdığı və dəymiş ziyanı tamamilə ödədiyi üçün cinayət məsuliyyətindən azad edilib, barəsində olan cinayət təqibinə xitam verilib.
