Sabunçu rayonunun Balaxanı qəsəbəsində yerləşən Təbriz Xəlilbəyli küçəsində uzun müddətdir davam edən antisanitar vəziyyət sakinləri təngə gətirib.
Bu barədə Bakuplus.az-a ərazidə yaşayan vətəndaşlar məlumat veriblər.
Sakinlərin sözlərinə görə, Balaxanı ilə Sabunçu qəsəbələrini birləşdirən və "Zavod yolu" kimi tanınan hissə tullantılarla dolu vəziyyətdədir, yağışlı havalarda isə əraziyə çirkab sular yığılır və yol faktiki olaraq keçilməz olur.
Onların bildirdiyinə görə, problem yeni deyil və artıq 3–4 ildir davam edir. Qış aylarında yağan yağışlar zamanı ərazi tez-tez su altında qalır. Buna səbəb kimi yol kənarlarının torpaq və tullantı təpəcikləri ilə doldurulması göstərilir. Nəticədə suyun axını üçün şərait yaranmır, yol palçıqlı vəziyyətə düşür və hərəkət xeyli çətinləşir.
Sakinlər qeyd ediblər ki, bir müddət əvvəl problemin həlli üçün müəyyən işlərin görüləcəyi bildirilsə də, faktiki olaraq yolun əsaslı təmiri aparılmayıb. Ərazi yalnız torpaq, daş-kəsək və tikinti qalıqları ilə doldurulub, kənarlarda isə xəndəklər qazılıb.
Bildirilib ki, əraziyə tez-tez traktor və yük avtomobilləri ilə torpaq və tullantılar gətirilərək boşaldılır ki, bu da vəziyyəti daha da ağırlaşdırır. Sözügedən yol gündəlik marşrut xətti kimi istifadə olunduğundan, avtobus sürücüləri də mövcud vəziyyətdən narazıdır.
Sakinlər sonda vurğulayıblar ki, məsələ ilə bağlı dəfələrlə aidiyyəti qurumlara müraciət etsələr də, nə bələdiyyə, nə də yerli icra orqanları problemin həlli üçün konkret addım atmayıb.
