Bakı şəhəri, Səbail rayonu, Badamdar qəsəbəsi, Tofiq Məmmədov küçəsindəki 12B saylı evin yaxınlığında (DSX xəstəxanasının yanı) ekoloji aksiya keçirilib. “Ecofront” ekoloji təşkilatının fəalları həmin ərazidə ümumi sahəsi 1 hektar olan ağacların qanunsuz kəsilməsinin dayandırılmasını tələb ediblər. Bu haqda bu gün, 19 noyabr tarixində Caliber.az məlumat verib.
Bildirilir ki, iş adamı Azərbaycan Respublikasının Ekologiya və Təbii Sərvətlər Nazirliyindən bunun üçün rəsmi icazə almasa da, ağacları məhv edərək tədricən ərazini ağaclardan təmizləyir.
“Burada yeni bina tikmək istəyirlər. Ağacların məhvinə görə sahibkar artıq cərimələnib, amma bu davam edir. Nə vaxta qədər şəhərimizdə belə çətinliklə əkilib-becərilmiş ağaclar yeni tikililərin qurbanına çevriləcək?”, - deyə ekoloqlar tikinti sahəsinin hasarını müvafiq yazılarla “bəzəyərək” sual veriblər.
Ekologiya və Təbii Sərvətlər Nazirliyindən bildirilib ki, bu sahə şəxsi mülkiyyətdədir və ağaclar müvafiq icazə alınmadan qanunsuz olaraq, başqa əraziyə köçürülüb. “Buna görə vətəndaş Zaur Dadaşov əraziyə məsul şəxs qismində 5000 manat məbləğində cərimə olunub”, - deyə nazirlikdən bildirilib.
[caption id="attachment_79857" align="alignnone" width="640"]
Foto Caliber.az saytı[/caption]
