Bu gün Azərbaycanda Müstəqillik Günü qeyd olunur.
Bayramın təməli 28 may 1918-ci ildə müsəlman şərqində ilk parlamentli respublika olan Azərbaycan Xalq Cümhuriyyətinin (AXC) yaranması ilə qoyulub.
27 may 1918-ci ildə Müsəlman Fraksiyasının üzvləri iclas keçirib və Azərbaycanın müstəqilliyini elan etmək qərarına gəliblər. 28 may 1918-ci ildə Müsəlman Fraksiyası tərəfindən İstiqlal bəyannaməsi imzalanaraq AXC yaranıb. Qısa müddət ərzində Azərbaycanın ilk parlamenti və hökuməti yaradılıb. Ölkənin sərhədləri müəyyən edilib, Dövlət Bayrağı və Himni təsis olunub və Azərbaycan dili dövlət dili elan edilib. Həmçinin ölkə üçün əhəmiyyətli olan digər tədbirlər həyata keçirilib.
Müstəqil Azərbaycan Cümhuriyyəti qısa ömründə böyük nailiyyətlər və qalibiyyətlər əldə edib.
Cəmi 23 ay mövcud olan AXC 1920-ci ilin aprel ayında sovet ordusunun hücumuna məruz qalaraq, süquta uğrayıb.
Uzun illər 28 may Respublika Günü kimi qeyd olunsa da, 15 oktyabr 2021-ci ildən etibarən bu tarix Müstəqillik Günü adı ilə rəsmi bayram kimi qeyd edilir.
