Əməkdar artist Cabir İmanovun bu ilin sentyabrında vəfat etməsindən sonra onun daha əvvəl çəkildiyi reklamlara aid lövhələrin Bakı Metropoliteninin stansiyalarında, efirlərdə, nəqliyyat vasitələrinin üzərində, bilbordlarda və s. hələ də qalması sosial şəbəkələrdə müzakirələrə səbəb olub.
Bəzi insanlar ölən şəxsin üzərindən kimlərinsə pul qazandığını deyərək, bu vəziyyəti tənqid ediblər.
"Bakı Metropoliteni" Qapalı Səhmdar Cəmiyyətindən bildirilib ki, metropoliten sözügedən müqavilənin tərəfi olmadığından, reklam yayımı prosesinə müdaxilə etmək səlahiyyətinə malik deyil.
C.İmanovun reklamına çəkildiyi süd məhsullarını ölkəyə gətirən distribütor şirkətin marketinq meneceri Tural Məmmədov isə olke.az-a açıqlamasında bildirib ki, aktyorun xatirəsinə hörmət əlaməti olaraq reklamları sökməyiblər: "Həm də müqaviləmiz var. Müqavilə uzunmüddətlidir və biz onun fotosundan istifadə etmək üçün illik ödəniş etmişik. Vəfat etdiyi gün aktyora hörmət əlaməti olaraq efirlərdə onun iştirak etdiyi reklam çarxlarının yayımını müvəqqəti olaraq dayandırmışıq. Hətta buna görə ailəsi bizə təşəkkür də edib. Amma metroda reklam lövhəsinin dəyişdirilməsi daha böyük vəsait tələb edir. Biz reklamlarla bağlı mərhumun qardaşı Tahir bəylə və ailə üzvləri ilə danışmışıq, reklamların yayımının davam etməsinə etiraz etmədiklərini deyiblər".
Qeyd edək ki, C.İmanov sentyabrın 29-da Səbail rayonu Üzeyir Hacıbəyli küçəsində yerləşən idman zalında infarkt keçirib. Hadisə yerinə təcili tibbi yardım briqadası çağırılsa da, 49 yaşlı aktyoru xilas etmək mümkün olmayıb. O, Yasamal qəbiristanlığında dəfn edilib.
