Bakı Apellyasiya Məhkəməsində qəsdən sağlamlığa az ağır zərər vurmada təqsirləndirilən Ömər Həsənzadənin (ad, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Emin Mehdiyevin sədrliyi ilə keçirilən prosesdə qərar elan edilib.
Qərara əsasən, apellyasiya şikayəti təmin edilməyib.
İttihama görə, hadisə 31 avqust 2024-cü il tarixdə, saat 04:30 radələrində, Bakı şəhəri, Səbail rayonu, Üzeyir Hacıbəyov küçəsində, Xaqani bağının yaxınlığında qeydə alınıb.
Ömər Həsənzadə ilə zərərçəkmiş İbrahim Fərəcov (adı, soyadı şərtidir) arasında mübahisə yaranıb. Mübahisəyə zərərçəkmiş şəxsin bir qədər əvvəl onların birlikdə olduğu kafedən təqsirləndirilənin tanışına məxsus çantanı icazəsiz götürməsi səbəb olub.Hadisə zamanı Ömər xuliqanlıq niyyəti ilə əlində olan dəbilqə ilə İbrahimin qol və kürək nahiyəsinə qəsdən fiziki zərbələr vurub, daha sonra başı ilə zərərçəkmiş şəxsin burun nahiyəsinə zərbə endirərək ona xəsarət yetirib.
Səbail Rayon Məhkəməsinin hökmü ilə təqsirləndirilən şəxsin əməlinin Cinayət Məcəlləsinin 127.2.3-cü maddəsindən həmin Məcəllənin 127.1-ci maddəsinə tövsif edilib və Ömər Həsənzadəyə 1 il 28 gün müddətinə azadlıqdan məhrumetmə cəzası təyin olunub. O, məhkəmə zalında dərhal həbsə alınıb.
