Bakının Sabunçu rayonunda 44 yaşlı kişi sevgi münasibətində olduğu qadına xəsarət yetirib.
Demokrat.az-ın əldə etdiyi məlumata görə, hadisə ötən ilin oktyabrın 8-də Ramana qəsəbəsində, Samir Əliyev küçəsində yerləşən adsız kafenin yaxınlığında baş verib. Kəlbəcər rayon sakini, 1982-ci il təvəllüdlü Əhliman həmin gün saat 17 radələrində əvvəllər sevgili münasibətində olduğu Aytənlə mübahisə edib. Mübahisə Aytənin nalayiq ifadələr işlətməsi səbəbindən yaranıb. Mübahisə zamanı Əhliman əli ilə bir neçə dəfə Aytənin baş nahiyəsinə zərbə endirib. Hadisəni törədən Əhlimanın barəsində Cinayət Məcəlləsinin qəsdən sağlamlığa zərər vurma maddəsi ilə ittiham elan edilib.
İş üzrə ifadə verən Əhliman ona elan olunmuş ittiham üzrə özünü təqsirli bilib. O bildirib ki, Aytən ilə təxminən 10 il müddətində sevgili olub. Oktyabrın 8-də, saat 12 radələrində adı məlum olmayan kafedə dayıısı oğlu İslam, dostları Müslüm və Namiqlə görüşərək spirtli içki qəbul edib. Bu zaman Aytən kafeyə gəlib, İslam onu da masaya dəvət edib. Yeyib-içdikləri vaxt Aytən sərxoş vəziyyətdə Əhliman barəsində xoşagəlməz ifadələr işlədib, bundan sonra mübahisə yaranıb, o keçmiş sevgilisini döyüb.
Cinayət işinə Sabunçu Rayon Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıb.
Məhkəmənin hökmü ilə Əhlimanın barəsində olan cinayət təqibinə xitam verilib.
