Bu gündən ali təhsil müəssisələrinə ixtisas seçiminə start verilib. Bu barədə Dövlət İmtahan Mərkəzindən bildirilib.
Abituriyentlər üçün həlledici mərhələ başlayıb. DİM-in məlumatına görə, bu günlərdə minlərlə gənc topladığı bal və gələcək arzuları arasında ən uyğun yolu seçəcək. Söhbət təkcə universitet adından yox, həm də illərlə qurulan karyera planlarının ilk addımından gedir. İndi hər kəs üçün sual eynidir: "Gələcəyini hansı ixtisas üzərində quracaqsan?"
Mövzu ilə bağlı Bakuplus.az-a açıqlama verən təhsil eksperti Elçin Süleymanovun sözlərinə görə, ixtisas seçimi abituriyentlərin həyatında əhəmiyyətli bir mərhələdir. Düzgün bir ixtisas gələcəkdə düzgün bir karyeranın ilk təməlidir:
"Təbii ki, burada əsas məqam abituriyentlərin topladığı bala uyğun universitet seçməsidir. Əvvəla hansı ixtisas üzrə oxumaq istəyin edilməlidir. Onu müəyyənləşdirməlidirlər. Daha sonra da bu ixtisasa daha yaxşı hansı universitetdə yiyələnə bilmələrini müəyyənləşdirməlidirlər. Toplanan balın ixtisasa uyğun olub-olmadığına baxılmalıdır. Bununla əlaqədar olaraq əvvəlki statistikaları nəzərdən keçirməlidirlər. Bəzi universitetlər süni intellekt əsaslı sistem formalaşdırıblar. Abituriyent balına əsasən o universitetin hansı ixtisasını seçə biləcəyini görür".
E.Süleymanov qeyd edib ki, I və II qrupda vəziyyət ürəkaçandır:
"Təbii ki, 600-dən çox bal toplayan abituriyent əvvəlki ilə görə azdır. Düşünürəm ki, xüsusilə II qrup və I qrupda əvvəlki ilə görə ballar bir qədər aşağı düşəcək. III qrupda vəziyyət fərqlidir. Orada keçid ballarını toplayanlar daha çoxdur. Yerlər isə bir qədər azdır. IV qrupda göstərici ötən illə müqayisədə bir qədər aşağıdır. Amma bu il yeniliklər var. Qarabağ universiteti tibb ixtisası üzrə qəbul aparır. Abituriyentlərə yeni imkanlar verir.
Dövlət İmtahan Mərkəzi bütün qruplar üzrə nəticələri açıqlayıb. Abituriyentlər buna əsasən seçim edə bilərlər. Əvvəlki illərə nisbətən bu il ümumi olaraq geriləmələr var. Bununla yanaşı I və II qrupda dövlət sifarişli yerlərin sayı artıb. III ixtisas qrupu xaric, düşünürəm ki, abituriyentlər digər qruplara aşağı ballar ilə qəbul ola biləcəklər. Təbii ki, düzgün seçim etməklə".
Qeyd edək ki, ixtisas seçimi bütün ixtisas qrupları üzrə avqustun 11-dən 19 avqust saat 23:59-dək internet vasitəsilə aparılır.
Nəzrin Vahid
