Abşeron rayonu Masazır kəndi Hüseyn Cavid küçəsində, "Zeynəb" marketin yaxınlığında zibil qabları aşıb-daşır.
Bu barədə Bakuplus.az-a həmin ərazidə yaşayan sakinlər məlumatlar veriblər.
Onlar bildiriblər ki, günlərlə zibili təmizləyən, yığan olmur. Nəticədə ətrafa üfunət yayılır, antisanitar vəziyyət yaranır.
Sakinlərin sözlərinə görə, zibilin vaxtı-vaxtında yığışdırılmaması nəticəsində sahibsiz itlər həmin əraziyə yığışır, küçədən keçmək müşkülə çevrilir.
Daha bir problem isə ondan ibarətdir ki, küçədə işıqlandırma sistemi yoxdur.
Sakinlər müvafiq qurumların bu vəziyyətə biganə münasibətindən gileylənirlər.
