Bakı Apellyasiya Məhkəməsində soyğunçuluqda və satış məqsədi ilə qanunsuz olaraq narkotik vasitələri əldə etmədə təqsirləndirilən Ümid Səfərovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası yekunlaşıb.
Pravda.az xəbər verir ki, hakim Zamin İbrahimovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilib, Nərimanov Rayon Məhkəməsinin hökmü dəyişdirilib, 4 il 4 ay müddətinə azadlıqdan məhrumetmə cəzası 3 il 4 aya endirilib.
İttihama görə, hadisə 01 dekabr 2022-ci il tarixdə, saat 21:45 radələrində Bakı şəhəri, Yasamal rayonu, S.Rəhimov küçəsində yerləşən "Mərkəzi Park"da qeydə alınıb.
Belə ki, 2003-cü il təvəllüdlü Ümid Səfərov sözügedən ərazidə zərərçəkmiş Namiq Əbdülova (adı, soyadı şərtidir) arxadan yaxınlaşıb, onun əynində olan gödəkcənin sol cibində saxladığı "Redmi Note 9S" markalı mobil telefonu götürərək qaçıb.
O, Nərimanov RPİ-nin 18-ci PŞ-nin əməkdaşları tərəfindən saxlanılaraq 18-ci Polis Şöbəsinin inzibati binasına gətirilib. Ümid Səfərovun üzərindən ümumi təmiz çəkisi 0,234 qram kustar üsulla hazırlanmış psixotrop maddə metamfetamin aşkar edilərək götürülüb.
