Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən Lətif Lətifovun (soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, sonuncu keçirilən prosesdə qərar elan edilib.
İttihama görə, hadisə 08 may 2025-ci il tarixdə, saat 01 radələrində Bakı şəhəri, Xəzər rayonu, Binə qəsəbəsində yerləşən "Elegant" adlı kafedə qeydə alınıb.
Belə ki, Lətif Lətifov ofisiant kimi işləyərkən qəsdən insan sağlamlığına ağır zərər vurub. Həmin vaxt kafeyə müştəri qismində gələn, spirtli içkinin təsirindən sərxoş vəziyyətdə olan və əvvəlcədən tanıdığı zərərçəkmiş Faiq Pənahov (soyadı şərtidir) pivə sifariş edib. Lakin Lətif kafenin bağlanmaq üzrə olduğunu bildirərək sifarişi qəbul etməyib. Bu səbəbdən mübahisə yaranıb, Faiq Lətifin və ailə üzvlərinin ünvanına alçaldıcı ifadələr işlədib. Lətif qisas almaq və Faiqi cəzalandırmaq niyyəti ilə kafenin zalında mətbəx bıçağı ilə zərərçəkmişin qarın nahiyəsinə bir dəfə zərbə endirərək ona xəsarət yetirib.
Hadisədən sonra Lətif Lətifov saxlanılaraq cinayət məsuliyyətinə cəlb edilib.
Bakı Ağır Cinayətlər Məhkəməsinin hökmü o, 3 il müddətinə azadlıqdan məhrum edilib.
Bakı Apellyasiya Məhkəməsi apellyasiya şikayətini təmin etməyib.
