Yeni il gecəsi Qubanın tanınmış hotellərindən birində baş tutan bayram şənliyi gözlənilməz sonluqla bitib. Belə ki, şən ovqatla başlayan istirahət ailə dramına çevrilərək məhkəmə zalında yekunlaşıb.
Demokrat.az xəbər verir ki, Bakı sakinləri Kamil və həyat yoldaşı Günəş (adlar şərtidir) bayramı qarşılamaq məqsədilə rayona yollanaraq "Macəra" hotelində yerləşiblər. Lakin gecə saatlarında hotelin restoranında başlayan narazılıq otaqda fiziki zorakılığa qədər böyüyüb. İddiaya görə, mübahisəyə səbəb kişinin restoranda tanımadığı bir uşağa 50 manat pul verməsi və uşağın atasının onlara yaxınlaşaraq tanış olmaq istəməsi olub.
Kamil məhkəmə ifadəsində həmin vaxt spirtli içki qəbul etdiyini və həyat yoldaşı Günəşin bu səmimiyyəti qısqanclıqla qarşıladığını bildirib. Onun sözlərinə görə, mübahisə zamanı əsəblərinə hakim ola bilməyərək Günəşi itələyib və ona müxtəlif nahiyələrdən zərbələr endirib.
Zərərçəkmiş Günəş ifadəsində bildirib ki, hadisədən sonra təqsirləndirilən şəxsin əlindən qaçaraq başqa hotelə gedib və gecəni orada keçirib. O, daha sonra Bakıya qayıdaraq hüquq-mühafizə orqanlarına müraciət edib.
Təqsirləndirilən şəxs ifadəsinin sonunda əməlindən peşman olduğunu, zərərçəkmiş şəxslə barışıq əldə etmək üçün dəfələrlə cəhd etdiyini bildirib.
Quba Rayon Məhkəməsinin hökmü ilə Kamil aylıq qazancının 10 faizi dövlət nəfinə tutulmaqla 9 ay müddətinə islah işləri cəzasına məhkum edilib.
