Bakı Apellyasiya Məhkəməsində xuliqanlıqda təqsirləndirilən kikboksçu Tülin Ələkbərovanın barəsindəki hökmdən verilən şikayətə baxılıb.
Pravda.az xəbər verir ki hakim Murad Məmmədovun sədrliyi ilə keçirilən iclasda apellyasiya şikayəti təmin edilməyib.
İttihama görə, Tülin Ələkbərova "Burju Baku" restoranında sərxoş vəziyyətdə qadını döyüb. O, tanışı Sevda və iki nəfərlə restorana gəlib, spirtli içki qəbul etdikdən sonra sanitar qovşağa keçib. Qapıda dayanan Sevda zərərçəkmiş Kəmalənin içəri girməsinə icazə verməyib, bu zaman mübahisə yaranıb. Tülin çıxaraq Kəmaləyə yumruq və təpik zərbələri endirib.
Kəmalə aldığı xəsarətlərə görə Tülindən 5 min manat təzminat tələb edib. Hadisədən sonra Tülin iki gün həbsdə qalıb, daha sonra polis nəzarətinə buraxılıb.
Nərimanov Rayon Məhkəməsi onu xuliqanlıqda təqsirli bilərək 6 ay azadlığın məhdudlaşdırılması cəzasına məhkum edib.
