Sabunçu Rayon Məhkəməsində dələduzluqda təqsirləndirilən Vüsal Dadaşovun (soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Elnurə Rəcəbovanın sədrliyi ilə keçirilən prosesdə hökm oxunub.
Vüsal Dadaşov etibardan sui-istifadə və aldatma yolu ilə özgənin əmlakını ələ keçirərək zərərçəkmişə xeyli miqdarda ziyan vurmaqda ittiham edilib.
İttiham aktına görə, təqsirləndirilən şəxs 2011-ci il istehsalı olan "Hyundai Elantra" markalı avtomobili 17 000 manat qiymətinə satacağına dair yalan vəd verərək, zərərçəkmiş Pərvin Fərzəliyevi aldadıb.
Avtomobili başqa şəxsin adına keçirməyə nail olan Vüsal onu lombardda girov qoyaraq 11 700 manat məbləğində pul əldə edib. O, götürdüyü vəsaiti şəxsi ehtiyaclarına xərcləyib.
Məhkəmənin hökmü ilə ona 2 il müddətə azadlıqdan məhrumetmə cəzası təyin olunub və dərhal məhkəmə iclas zalında həbs edilib.
