Abşeron rayonu, Xırdalan şəhəri İlham Cəfər küçəsindəki yaşayış evlərinə bir müddətdir ki, qaz çox az təzyiqlə verilib.
Bu vəziyyət isə istilik sistemi olmayan bəzi evlərdə soyuq və yeməksiz şəraitin yaranmasına səbəb olub.
Patrul.az-a mövcud vəziyyətlə bağlı Xırdalan sakininin şikayəti əsasında "Azəriqaz" İstehsalat Birliyinə sorğu ünvanlayıb.
Qurumdan sorğumuza cavab olaraq bildirilib ki, sözügedən ünvanda qazın təzyiqi həqiqətən də aşağı olub və evlərə qazın verilişini tam təmin etmək məqsədilə yekun tədbirlər görülür:
"SOCAR-ın "Azəriqaz" İstehsalat Birliyi olaraq bildiririk ki, Abşeron rayonu, Xırdalan şəhəri, İlham Cəfər küçəsində bəzi hallarda təbii qazın təzyiqinin aşağı olması ilə bağlı sakinlərin müraciətləri həqiqətə uyğundur. Abonentlərə dayanıqlı, təhlükəsiz və keyfiyyətli qaz təchizatının təmin edilməsi məqsədilə sözügedən ərazidə müvafiq tədbirlər görülüb. Belə ki, qaz tənzimləyici qurğu təmir edilib, problemin tam aradan qaldırılması üçün isə 350 metr uzunluğunda yeni qaz xətti çəkilib və hazırda yekun tamamlama işləri aparılır. Hazırda qeyd olunan ünvanda təbii qazın verilişi tam bərpa olunub".
