Hər axşam “Koroğlu” metrosunun yaxınlığında avtomobil sürmək müşkül məsələyə çevrilir - Bakı kəndlərinə sərnişinləri 1 manata aparan taksi sürücüləri nəqliyyatın hərəkətini çətinləşdirirlər. Onlar iddia edir ki, müştəri yığmağa başqa yerləri yoxdur, taksilər üçün xüsusi sahə ayrılmayıb. Bu haqda Bakuplus.az bu gün, 4 may tarixində ARB TV reportajına istinadən məlumat verir.
Sürücülər deyir ki, onların daha rahat fəaliyyat göstərmələri üçün yer olsa da, burada ödənişli parklanmaya belə icazə verilmir.
Məsələ ilə bağlı Bakı Nəqliyyat Agentliyindən bildirildi ki, taksi və avtobusların dayanması üçün şərait yaradılıb, sıxlığa səbəb isə qeyri-qanuni taksi fəaliyyəti ilə məşğul olanlardır.
BNA-nın mətbuat xidmətinin rəhbəri Mais Ağayevin sözlərinə görə, sürücülər xaotik vəziyyət yaradır, nəticədə qəsəbələrə yola düşən avtobusların, eləcə də nəqliyyatın hərəkətində ciddi problemlər yaranır. BNA öz səlahiyyətləri daxilində avtonəqliyyat vasitələrinin durma və dayanma qaydalarına əməl olunmasına nəzarəti həyata keçirir. Lakin aidiyyəti qurumlar tərəfindən ərazidə qeyri-qanuni sərnişindaşımalara qarşı da tədbirlər görülsə, şübhəsiz ki, müsbət nəticə əldə etmək mümkün olacaq.
Dövlət Yol Polisinin əməkdaşı Araz Əsgərli bildirir ki, polis əməkdaşları vəziyyəti tənzimləməyə çalışır. Lakin sözügedən ərazidə taksilərə tələbat çoxdur.
Onun sözlərinə görə, ərazidə qeyri-qanuni fəaliyyət göstərən taksi sürücüləri, eləcə də bu xidmətlərdən istifadə edən vətəndaşlar bəzi qəsəbələrə gedən marşrut xətləri kifayət qədər olmadığından oradakı yolu bağlayırlar.
Taksilərin körpünün altında yığılması Ziya Bunyadov və Heydər Əliyev prospekti ilə hərəkətdə olan avtomobillərin pik saatlarda tıxacda qalmasına səbəb olur.
