Bakıda 6 il əvvəl avtomobilini satan şəxsə həmin nəqliyyat vasitəsinin cərimələri gəlib. Bu haqda bu gün, 29 aprel tarixində Bakuplus.az Xəzər Xəbər-ə istinadən məlumat verir.
Bakı sakini Əlövsət Bağırov 2016-cı ildə “Niva” markalı avtomobilini alan şəxsə etibarnamə verib. Ancaq alıcı avtomobili öz adına keçirməyib və etibarnamə ilə sürüb.
“Gördük ki, adımıza cərimə gəlir. Getdik DYP İdarəsinə izahatla, qanunla, qaydayla yazdıq ki, bu maşın satılıb, bizə cərimə gəlir. Onlar bizdən izahat götürdülər, dedilər ki, daha sizlik heç nə yoxdur. Hər hansı bir problem olsa sizi çağırarıq. Bu yaxınlarda isə, cərimələr ödənilmədiyi üçün qardaşımın sürücülük vəsiqəsini əlindən aldılar”, - deyə şikayətçi bildirir.
Baş Dövlət Yol Polisi İdarəsinin rəsmisi Mübariz Ağayev məsələ ilə bağlı bildirdi ki, avtomobilin idarə edilməsi üçün 2015-ci ildən bu günə qədər 4 müxtəlif adama etibarnamə verilib. Onların hamısının müddəti bitdiyindən cərimələr nəqliyyat vasitəsinin sahibinə göndərilib. Onun müraciəti araşdırılacaq.
