Bakı Ağır Cinayətlər məhkəməsində dələduzluq, mənimsəmə və rüşvətxorluqda ittiham olunan təhsil işçilərə hökm oxunub. Bu haqda bu gün, 16 aprel tarixində Qafqazinfo xəbər verib.
Mədəniyyət və İncəsənət Universitetinin (AMİU) nəzdində Humanitar Kollecin rəhbəri Gülnarə İskəndərova, Tibb Universitetinin əməkdaşları Kəmalə Alıyeva və Elmira Babayevanın cinayət işi üzrə məhkəmə prosesi başa çatıb.
Bakı Ağır Cinayətlər Məhkəməsinin hökmü ilə onlar məhkəmə zalında həbs ediliblər. İsgəndərova 6 il 6 ay, Alıyeva və Babayeva 6 il müddətinə azadlıqdan məhrum ediliblər.
İsgəndərova 2017-ci ildən ATU-nun əməkdaşları ilə birgə qulluq mövqeyindən istifadə edərək Tibb Universitetində müxtəlif vəzifələr üzrə 21 nəfərdən ümumilikdə 126.500 manat pul alıb. Qeyd edilir ki, o, vətəndaşları dələduzluq yolu ilə rüşvət verməyə təhrik edib və universitetin adından universitetdə müxtəlif vəzifələrə qəbul olunmaq üçün saxta əmrlər verib.
Həmin şəxslərə qarşı 2021-ci ilin dekabrında cinayət işi başlanıb və iş üzrə Baş Prokuror yanında Korrupsiyaya Qarşı Mübarizə Baş İdarəsində araşdırmalara başlanılıb.
