Bakı Ali Neft Məktəbinin 3 tələbəsi ABŞ-da 100 min dollardan yüksək məbləğdə doktorantura təqaüdü qazanıb. Bu haqda BakuPlus.az bu gün, aprelin 21-i xəbər verir.
Ali təhsil müəssisəsinin Proseslərin avtomatlaşdırılması mühəndisliyi ixtisasının V kurs tələbələri Xaqan Kərimov, Sənan Həsənov və İsa Cəfərov magistratura təhsili almadan ABŞ-da birbaşa tam təqaüdlə doktorantura pilləsinə qəbul olunublar.
Tələbələrin hər birinin ABŞ universitetlərindən qazandıqları təqaüdün məbləği 100 min ABŞ dollarından yüksəkdir. Onlar Kompüter elmləri ixtisasının Kibertəhlükəsizlik istiqaməti üzrə təhsil alacaqlar.
Xaqan Kərimov Yuta Universitetini (University of Utah), Sənan Həsənov Mərkəzi Florida Universitetini (University of Central Florida), İsa Cəfərov Nyu-York Şəhər Universitetini (City University of New York) seçib.
Hər üç tələbə Bakı Ali Neft Məktəbinə 2017-ci ildə yüksək balla daxil olub və hazırda onlar təhsil almaqla yanaşı, müxtəlif şirkətlərdə çalışırlar.
