Bakıda “Bizim həyət” layihəsi çərçivəsində daha bir həyət abadlaşdırılıb. Bu haqda BakuPlus.az Report-a istinadən bu gün, 13 aprel tarixində xəbər verir.
Xətai rayonu, Rahib Məmmədov küçəsi ev 24, 26 və Aşıq Ələsgər küçəsi 2 ünvanlarında 1300 nəfər sakinin yaşadığı 3 çoxmərtəbəli yaşayış binasının həyəti yenilənib.
Abadlaşdırılan növbəti həyətdə əlil və sağlamlıq imkanları məhdud insanların rahat hərəkəti nəzərə alınıb, bütün yaş qruplarından olan insanların açıq havada istirahəti üçün əlverişli şərait yaradılıb, o cümlədən çoxsaylı söhbətgah və oturacaqlar, tullantılar üçün qutular quraşdırılıb.
Həyətin ərazisindəki mövcud yaşıllıqların bərpası ilə yanaşı 500-ə yaxın müxtəlif cinsli ağaclar və kollar əkilib, 2500 kv.m ərazidə yaşıllıq zolağı salınıb.
Həmçinin sakinlərin təhlükəsizliyinin təmin edilməsi məqsədilə ərazidə müşahidə kameraları quraşdırılıb.
