Son günlər sosial şəbəkələrdə “Bakı Kart”ların bloklanması ilə bağlı məlumat geniş yayılıb. Paytaxt sakinləri kartlarla bağlı çoxsaylı problemlərdən və ödənilən pulların yoxa çıxmasından şikayətlənirlər. Bu haqda ATV reportaj hazırlayıb.
Karta yüklənən pullar avtomatik silinir, terminallarda bəzən kartlar işləmədiyi kimi qeyd olunur, bəzi sərnişinlərin kartı bloklanır. Sosial şəbəkələrdə yayılan məlumatlara görə, “Bakı Kart” xidmətinin fəaliyyəti paytaxtda bir çox ictimai nəqliyyat istifadəçiləri üçün problemə çevrilib.
Bakı Nəqliyyat Agentliyinin mətbuat katibi Mais Ağayev kartların bloklanma ehtimalını təkzib etdi. O bildirib ki, “Bakı Kart”ın bloklanması yalnız müştərilərin şəxsi müraciəti və kartı təqdim etdiyi halda mümkündür. Amma bu problemlə üzləşdiyini iddia edən sərnişin istənilən halda müraciət ünvanlamalıdır ki, araşdırma aparılsın.
