Bakıda “Barokko Günləri” Beynəlxalq Musiqi Festivalı baş tutacaq. Bu haqda BakuPlus.az Azərtac-a istinadən 7 aprel tarixində xəbər verir.
Aprelin 23-dən 26-dək keçiriləcək festival Azərbaycan Respublikası Mədəniyyət Nazirliyinin təşkilatçılığı ilə baş tutacaq.
Festival çərçivəsində M.Maqomayev adına Azərbaycan Dövlət Akademik Filarmoniyası, Azərbaycan Dövlət Akademik Opera və Balet Teatrı, Kamera və Orqan Musiqisi zalı və Ü.Hacıbəyli adına Bakı Musiqi Akademiyasında konsertlər, tamaşa və ustad dərsləri keçiriləcək.
Ölkəmizdə ilk dəfə keçirilən “Barokko Günləri” festivalının açılışında XVIII əsrin görkəmli alman bəstəkarı K.V.Qlyukun “Orfey və Evridika” operasının premyerası baş tutacaq.
Dünyaşöhrətli musiqi xadimi, Roma, San Karlo və digər opera teatrlarının bədii rəhbəri olmuş, D’arte Lirika Akademiyasının direktoru, professor Vinçenzo De Vivonun (İtaliya) festival çərçivəsində ustad dərsi keçiriləcək.
